Nungak Tangval te ading "Valentine's Day Message"
ZomiDaily :: Tuni pen leitungbup in "Valentine's Day" ci'n pawilianpi khat akhammah bangun Google te'nzong a Homepage ah "Valentine's Day Google Doodle" khat nakoih uhhi. www.google.com ah nahawh lecin, Homepage ii alaizang ah "Play" Button khat naki linglutlut 
ding hi.
Tua Play Button tungah namek lecin YouTube video khat ongki hongding a, "Valentine's Day" tawh kituak in ki itna limlak hoihmahmahkhat na muding hi. Tua Video ah lasa pen Tony Bennett cihkhat hihtuak a, ahi zongin ala sangin alim kilak Animation te enleng akhiatna thukmahmah khat ongmusak tawh kibang hi.
Hih Video abawlkhiapa in bang ongmusaknuam cihpen ihteltheih liankei a, ahi zongin "Zawlheldan" onghilh cilengzong kikhialo khading hi. Video sungah nungakno khatin khau akankan laitak, tangvalno khatin nungakno ii deihtheihtheihding Google ah zongtawmtawm in vazolsawm niloh hi. Pak vapiazel, Chocolate vapiazel, Puansilh vapiazel, Naumilim hoihnono vapiazel, Phone vapiazel, Lukhu vapiazel, Mutpuak vapiazel, Laizum valotzel cihbang in atuamtuam in vazol niloh hi.
Ahi zongin nungakno pen neihlelam vanhoih nonote tawh navulpah ningniang khollo a, a khaukan mahtawh diangseuseu in na thudon khollo lelhi. A nunung ah tangvalno inzong khaukan khat pua in, agei ah ava kanleh nungakno in tampi ngaihsun nawnlo in vakawiphei pahhi. Tuakhit ciangin anih un khaukan kankhawm in diangseuseu uhhi.
Hihpen "Zawlheldan" thupi mahmahkhat cihtheih ahihi. Itna taktak ihcihpen neihlelam te himasalo zaw in, ih lungsim kibatpih, ih ukdan kibatpih, ihzia ihtong kibatpih dingpen athupi mahmahkhat ahihi. Nungak, Tangval te'n zi leh pasal ihzonding ciangin neihlelam te mitsuanlo zaw in, ih lungsim ih uk ihki batpihte ihtelzawkding tukum "Valentine's Day Message" kongkhak uhhi. Happy Valentine's Day! ZomiDaily
