Kawlgam Gospel lasate le Music siamte kipahtawi
Kawlgam ah Laisiang thosang minthang khata kigen ahi sanggam Mizo te Rev. Dr.Morris Remlal Liana , B.A.,B.D.,M.Div.,M.A.,Th.M.,D.min., Ph.D (Cand) makaih Union Biblical Seminary (UBS) Laisiang tho sangte a (11) veina sang zote lukhu nelkai piakna ( The 11th Commencement Service) pen abeisa February 4,2012 ni-in, Yangon khua laizang a Immanuel Baptist Church ah thupitak nei uh hi.
Tua lai ah sang zote B.Th. mi (12), M.A Theology (2), M.Div (7), te le Kawlgam Guitar siam minthang Saw Chit San Maung pen Doctor of Divinity (DD), azi Daw Sharon Khin Khin Moe ( Director of Myanmar Young Crusaders) pen Doctor of Humane Letters (DHL) ,banah Kawlgam sungah Love song sa peuh mah loin, Pasian phatna la gelh le lasa Saya Saw Win Lwin (MYC), le Tg.Thang Sian Sang @Sangpi te Master of Music (Vocal & Composing) , Honorary le Mizote Saya 2 le Sayama 1, pen Master of Ministry (M.Min), Honorary mah pia in, a vekpi mi 7 te Honorary degree pia cih kiza hi.
A diakdiak in Master of Music angah Saw Win Lwin le Tg. Sangpite nih in Pasian phatna la tam phuak khia in, leitung la ( love song ) phuak le sa het lo uh hi. Tua bek tham loin, leitung late phuakin, sa le uh sum tampipi ngah ding kim lai Pasian' la bek asaknate hang leh Gospel paina le Gospel show te ah la sa bek lo-in a tecipanna uh leh,a thuhilhnate hang tawh gam sung bek hi loin, gamdang mun tuamtuam zin kawikawi in, lasakna le Tetci panna tawh khamangte le thanem mi tampite Topa' kiang a tunpihnate hangin Pahtawina (Honorary ) kipia hi " ci in UBS Founder & President Rev. Dr. Morris Remlal Liana in pulaak ci hi. Pahtawina angah Tg. Sangpi in a pa tungah, "Pa aw, Master of Music ong kipiak sawm ven, ka sang diam?" ci-in a pa hopih masa in, a pa in zong Tg. Sangpi tungah, " Pasian teeltuam le Pasian sathau nilh tuam khat ahihna tawh lungdam takin sang ni " ci-in a pa Rev.Cin Khen Thang in genpih cih thu kiza hi
Sangpi le Saw Win Lwin te in kum (10) val sung Pasian' la aphuah le asaknate sungah pahtawina angah mi mah, zia-etna zong tam veipi tak mah atuah khakna zong om hi. Pasian' nasem pipite mahin, amau laphuakte simmawh nuam bek tham loin, angah ding love-gift nangawn na a cinga kipiak loh khawng ciangin, mihing ahihna tawh amah zong a khialhkhakna a om cianga mite in nakpitak-a gensiatna athuak ciang khawnga,mite etcikna thuak-a hih bangin, hih bangin ka omom sangin Leitung lasa kawm sa-in om zaw leng mite in ong gensia lo zaw kha ding ci ina pate tungah gen ngei ci hi.
Tg. Sangpi pa in a genna ah, " Hih pen mite ong piak ziau hi loin, Pasian in na thuakna, na gimna, na supna, Ama' adinga kha mangthang matna le ong zawhpih lai vuanna( test )te na zawhna tungtawn-a ong kipia ahih manin, lungdam tak-in sang in " ci in a pa in genpih ngei ci hi. Tua banah Sangpi le Saw Win Lwin pen amau kum 10 val sung tawntung aa sin Seminary akah ngiat ngiat , a haksa mah mah laivuanna zong tam vei pi mah practical aa a vuan ngiat ngiat uh ahih man-in Topa in kipsakna (recognize) na hi ding hi ci-in , a pa Rev. Cin Khan Thang in genbeh cih kiza hi.
Bangbang le hih bangin Kawlgam bup huam a Music lam siampen Saw Chit San Maungte nupa le Laphuak le lasasiam minthang Saya Saw Win Lwin le Zomi Vontawi Tg. Sangpite in minphatna le pahtawina lukhu nelkai hong ngahna hangun, Pasian min i phat kawmin, Tongsan Media Group pan lungdampihna lianpi i pulak hi. Topan a tate hong zatsak semsem hen la, khansauna thupha hong piaksak lai hen.
Rev. Cin Khan Thang
Hallelujah Assembly of God
Monywa, Sagaing Division-Myanmar
Source: Tongsan