Tulsa, OK ah Zomi Nam Ni nuamtak kibawl
Zanni Feb 20, 2012 ni-in Tulsa khua ah Zomi Innkuan Oklahoma makaihna tawh 64 kumcin Zomi Nam Ni nuamtak in kibawl thei hi. Kum danga a kibawl theih zelna, Jewish Community Hall ah nitak nai 7:30 PM in kipanin nai 10:30 pawlin hun nuamtakin kizo hi.
Hih Zomi Nam Ni tawh kisai ciaptehhuai ka sak deuh leh ka lungdamna pawlkhat:
1. Ni dangin Feb 20 ni lianin Zomi Nam Ni kibawl lian thei khollo a, tu kuma kipanin a ni maha zat ding kihanciam in, mipi a kuamah peuh in i vaiteng nusia in "February 20 ni, Zomi Nam Ni hi" ci-in kipai tek ahih manin lungdamhuai mahmah hi. Mipi zong 300-400 peuhmah kipha ding hi. Kum dang bang loin Feb 20 ni lianin kibawl thei ta ahih manin a kuamah peuh kilungkim tek dingin kilamen hi.
2. Thugenpi ding, Zinmang mun dang panin hong pai loin Tulsa, OK tualsuak, ZIUSA President pipa, Pa TaangGo Sawm Khup ngiat in thu hong gen a, mipi in tha kingah in a thugente manpha kisa mahmah hi. Kum dang bang loin tangthu sut cih lamsang hiloin minam vai tawh kisai sepkhiatsa leh sepkhiat lai ding genna pulakna tampi om a, khantoh lam a kimanawh tektek ta hi.
3. Fashion show zong kum simin muh nop semsem a, khua sung Lia leh Tang te Zonik leh Zopuan tawh a hoih thei penpenin hong kizem uh a, ithuai in ngaihbaang thei mahmah uh hi.
4. Laam zong muh nop thei mahmah a, kum danga laam a kilak zo liamliam pen tu kum ciangin khangnote hong thalawp in lam nam tuamtuam a lamdang nono hong lakkhia uh a, papi khangham pawl khat bang, kam-kaa zo kici hi.
5. Lasak zong tualsuak khangnote phuah, sak leh phuah a kithuah phialphial zong om a, kinasia mahmah ta hi, cih theih hi. Zam Sian Khai @ Khaipi, Suum Mung te lawmta teng, Pa Kam Lun Pau @ Sendeih, Cing Cing@ Ning Bawi, Khupno, I-Zomi(Muanpi, Munglek, Sangpy) te in amau phuahtawm la ngiat hong sa uh hi. Adang lasate zong siam thei mahmah uh hi.
6. Kum simin Music tumging tum ding kisamh den a, a hunhunin khangthak tangval te hong om toto in, guitar siam, drum-khuangtum siam zong i khua sungah kitam mahmah ta cihna hi.
7. David Thawnpi leh a lawmte in Kawlte' A-nyeihn dan khat hong bawl uh a, Zomite sunga kipawlna a tamzia, kithutuah theihloh zia, makai a ki-utzia, a tung masa a tungnunung a kithusim lohziate, mi a kipampaih ziauziauzia te ciamnuih leh cihtak tawh hong lak uh a, hi kisa mahmah in mipi kinui ziahziah hi.
8. CNF te in Tedim-Tonzang-Cikha gam ah mun a hong lakloh nading dalna vai tawh kisai, sepkhiatna ding fund leh Hall sap ding sum kidong a, USD 999.00 kingah a, lungkimhuai mahmah hi.
9. Kum dang bang loin khua sung pawlpi siate ahi zongin khua sung nu le pate in nakpi takin tha hong pia uh a, i khua sung nuam tektekin i minam sungah Pasian thu ahi zongin, minam thu ah ahi zongin kithutuahna hong om tektek ta in kimu hi.
Kipuahphat ding kisam lai:
1. Hun pen nai 7:00 PM in kipan ding cih kigel a, kum dang mah bangin kiziakai den hi. Nai lang taang kiziakai a, mai lam hun ah ZIOK makaite a kipan, numei naupang a kuamah peuh hun man ding hanciam mahmah kul lai ding hi.
2. Naupang kep kisiam nai lo hi.
3. Hun zat pen nidang sangin kisiam zaw ta a, a hi zongin kipuahna ding, tam mahmah lai hi.
Hih pawi sunga mannte zong hong khak ing. Anuai-a link ah na na etsak un.
Lungdam mahmah hi.
Zomi Innkuan Oklahoma makaite taangin,
Mangpi
--
Vung Lian Mang
4232 E 84th St.,
Tulsa, OK 74137
Cell : 918-906-9274