ZIUSA Zomi Nam Ni Thuphapuak
Zomi Innkuan USA, Inc.
ZOMI COMMUNITY USA
Oklahoma, Florida, Washington DC, Illinois, Texas, Ohio, Oregon, Iowa, Indiana, Utah, Georgia, Arizona, Missouri, Kansas, Michigan, New York, W. Virginia, Pennsylvania, Nebraska
Zomi Nam Ni Thuphapuak
Zomi laizom u leh nau, nu leh pate aw,
Zomi Innkuan USA kipawlna, Executive Committee buppi tang’in Zomi Nam Ni in “Dam maw” ci-in hong hopih ingh.
February kha (20) ni pen ei Zomi-te a’ding in ni lian, ni thupi, ni manpha ni, “Zomi Nam Ni” ahi hi. Tu kum, 2012 kum Zomi Nam Ni in akua mahpeuh cidam lungnuam takin vai ding thei a, minam picing hihna lungsim paai in Zomi Nam Ni apahtawi thei dingin hong lam-en ingh.
Tu in Zomi Nam Ni ahong piankhiat zawh kum (64) ahong cing hita a, hi bang hun ciangin Zomi-te muntuam gamtuam ah kithehthang in, ih tengta hi. Ahi zongin, ih tuntunna ah Zomi Nam Ni phawk in, pahtawina pawi, muakna pawite limtak in ih bawl ciangin ih gam leh ih minam itna a kipan, Zomi-te khat leh khat kikhualna, ki-itna hong khang semsem ahih manin, hi bang dinmun ah ahong kha Anungta Pasian tung lungdam thu ih ko a, a min ih phat hi.
Zomi-te’ tangthu sung ah taangpi thuneihna a kizahtak ni, a kithusim ni, mipi deihna tawh thu a kikhensat ni, Democracy dan a kizuih masak ni a kipan Zomi Nam Ni ahong piangkhia ahi hi. Ahi zongin, tua mipi deihna tawh thu khensat theihna hamphatna pen 1962 kum a kipan akitaankik khinta hi. Zomi Nam Ni ahong piankhiat zawh kum (64) acin’ khit, tu ni tu hun laitak in Zomi taangpi taangta thuneihna kizahtak in, mipi deihna tawh thu a kikhensat theina dingin lam-etna a om laitak ahi hi. Democracy dan tawh kalsuan dingin ih kithawi laitak ahi hi.
Tua hi a, tu kum Zomi Nam Ni dawnna, muakna, pahtawina pawite ih bawlna pen kum dang a kibawl pawite sang’in nakpi takin manpha zaw a, a khiatna nei Zomi Nam Ni in simtak semsem hi. Hih bang dinmun ah ih om laitak, Zomi Nam Ni ahong piankhiatna thu bulpi a taksuakkik dingin ih lam-et laitak in, muntuam gamtuam a om Zomi-te in minam kician khat hihna tawh athak in kipumkhat a, ih minam mabante kithutuak takin ih pankhop ding kisam mahmah hi. Gam sung a omte mahbang in tuipi galkaai Zomi-te zong ih omna munciat ah minam khat, si khat sa khat, sanggam unau laizom khat hihna tawh kipawlkhawm a, ih gam leh ih minam vaite ih hawmkhop theih ding lunggulh huai mahmah hi.
Zomi Nam Ni tungtawn a hamphatna hangin mipi deihna tawh gam leh minam thu vaihawm a, taangpi thuneihna zahtakna tawh Zomi-te akalsuan dingin ih kithawi laitak in abeisa hun sung a kalsuan dan maanlote, mipi deihna tawh kilehbulh ki-uknate, taangpi thuneihna a thusimlo makaite leh kimakaih dante ih hepkhiat ding kisamta hi. Tuamah bangin Zomi Nam Ni tungtawn a hamphatnate ih ngah theihna ding ahong khaktan thei, Zomi-te minam maban ih kalsuanna ah upna leh biakna siksan in kipawlkhop theihlohna, pau leh ham awkaih zia zui-in kikhenna, beh leh phung hangin kilangpanna cihte pilvang takin ih pelh ding kisamta hi.
Zomi Nam Ni tungtawn a hamphatna bukim ngah in, gam leh minam vai, khua leh tui vai, kipawlna vaite, minam khat hihna tawh pangkhawm a, leitung minam dangte tawh liangko kikim in, a khangto, a picing Zomi-te ih suah zawhna dingin tu kum Zomi Nam Ni in thathak sanin ih hanciam ding hi.
Hi bang hun ciangin, tuipi gal khat ahzong, Zomi-te in Zomi Nam Ni tungtawn a hamphatna bukim ih ngah theihna dingin minam khat, si khat sa khat, sanggam unau laizom khat, khua khat tui khat hihna tawh kipawlkhawm in ih phuh, Zomi Innkuan kipawlnate phungvuh a, ih khua leh tui vai, ih gam leh minam vaite ih pankhop tawntung ding ih kihanthawn hi.
Zomi Nam Ni khangsawt in, taksuak tawntung tahen!
Pa Go Sawm Khup
President
Zomi Innkuan USA
Tulsa, OK, USA
February 20, 2012