Malaysia Zomi Nam Ni Sapna
Zomi Nam Ni thaiciang hong tungta ding hi. Zomi hi’ng a kici peuhmah Zomi Nam Ni pawi kihel huai hi. Minam aa ding vei ingh ci aa thu ngetna tawh ma pangte, lai tawh, athu tawh, kampau tawh ma pang khempeuh, taksa tawh minam veina ih lah ni ding zong ki cithei hi.
Amun ding
Chin Woo Stadium mah ahihi. A tello khat peuhin, hih anuai aa phone nambatte-ah kikan thei hi; 016 293 9027, 012 976 6094, 016 995 6231, 017 991 0457, 014 738 1459
Ahun
11am leh 6pm kikal hi-in, 11am in hun patding hipah hi.
Kithawina lawhcing
Vaihawmna lamah, committee te mahmah zong kikupna kinei thei zel aa, kikupna bek hilo-in hihtheih tawp tawh vaihawmna lam ki lawhcing hi. Gampua lam pan, la tawh hong zemding Kam Seen hong tungkhin aa, Pu Zo Khai zong February 17, 2012 ni-in Malaysia hong sikkik thei hi.
Hungelna ki kipsakta
Ngeina leh ih zia ih tong tawh kituak laam tuamtuamte, ZOMUS pan lasaknate, thu manpha gennate, Zomi Cup pahtawina piakna cihte kihel ding hi. UNHCR pan uliante’ tha piakna ki ngen leuleu-in, a zum hon’ ni pi mah uh hun tomno pia aa hong paisawm uh, hong zasak khin uh hi.
Tutung Malaysia gammi, sound production anei, lasa, lagelh minthang (Tg.) Ariff Akhir in zong, Zomi te Minam Ni la dawng nih tawh hong pahtawi sak ding ki ngenin, hong sangthei hi. Amah pen, a lamdang veve khatin galtaite avei leh pawi tuamtuam ah ama lasiamna leh music lam atelnate tung tawnin UNHCR mahmahin azat pahpah khat ahihi.
Sum tawh ma pangte vai
Aki hawmkhiasa THUPUAK te sungah, ahun leh laimai awngdan zui-in, Khua Kipawlna pan, pawlpi pan, mimal tungpan sum tawh ma pan’na a lakte, ki suaksak toto hi. Tua sungah, lai nasep lam kicin’lahna tawh pawlkhat kim takin kikhum khalo theizel hi. Aki mangngilh tawm hilo hi. Zomi Nam Ni pawi hun sungah hong kihawm ding booklet (laibu neu) sungah kim takin kikhum khin hi.
ZUIHDING
Pawi bawlna innpi sung peuhmah ah kuncil ih siatkhak leh, nidang ciang phalna kingah nawnlo ding cih, hong vaikhak phapha uh hi. Pawi paima-in a theisa-in kithawi pah ni! Hih vai ana zakhalo kiukiau a omkhak ding cihna tawh tua vai a encik ding thunei rela te leh Zomi palaite kiseh khin hi.
PAWI BAWLNA INNPI SUNG MUN KHAT PEUHPEUH AH KUNCIL SIAT KIPHALLO HI!
Sian’thona bek hilo-in, pawi nawngkai sakthei thu khatpeuh hong om khak zenzen leh cihna tawh rela (8) bang kikawm khin hi. Zukham, zakham sa-in pawi pai vetloh ding thupi hi.
Theihsakna
An leh meh lim nono, tuivotte kizuak ding hi. Committee te ii sehsate bekin van zuakthei bek hi. Nektheih dawntheih hita leh, summet bawlna van khat peuhpeuh zuak ki phallo hi.
Zomi Cup kihel khua khempeuh theihding
Zomi Cup 2012 a kihel Khua 26 pan pahtawina sangding khat/nihta ngeina puan tawh hong kithawi pah un. A Khatna pan A Lina ngah a kimawl khempeuh ki lamen hi.
Tg. Kham & ZomiDaily
(Information, ZND Committee)