Pakistan gamah Motorcycle Suicide khat piang, mi 26 si
ZomiDaily :: Pakistan gamah Motorcycle tuangkawm in mikhat in Suicide Bomb sukham ahih manin mi 26 in sihlawh leuleu cih AFP in genkhia hi. Hihpen tukhasung Pakistan gamsung Bomb puaktamlak ah misi atampen hipah a, Shiite Muslim te tampi atenna mun ahi Pakistan nitumna gamlam ah apuaktam ahihi.
Muslim tepen Friday nisim in Mosque ah pai uh a, thu agenden te uh ahihi. Hih Suicide Bomb zong Parachinar khuasung aom Mosque geikhat ah Muslim te'n zanni Friday ni-in thugen in aomlaitak uh aki sutam ahih manin, asi aliam atamzaw pen Mosque ah thugen in apaite ahi uhhi.
Islamabad khua aom Express Highway tungah hih Suicide Bomb hangin lungkimlo mipawlkhat in lungphona aneih laitak
Parachinar khua pen Kurram District sungah khuapi khat hi a, US galkap te'n gal leh sa tawh akidimna munkhat in aciapteh uh ahihi. Hih khua ah Taliban leh Al-Qaeda migilo galkapte tammahmah ahih manin, leitungbup ah galgim a namkinken tawntung khuakhat hi ci'n Washington in a ciapteh ahihi.
Nungkha Janauary 10 ni-inzong Pakistan gamsung Khyber Tribal District ah Bomb puakkham ngeikhin a, tualai in mi 35 si hi. Motorbike Suicide Bomb pen tuazawh ahuaisia penpen hipah hi.
Khuasung mite genkhiatna ah misi 26 banah innsia losia zong tampi om ci uhhi. Khuapisung mipi tamna ahi Bazaar tawhzong kinai ahih manin vanzuakna inn 8 bang siacip cihzong genkhia uhhi.
AFP te kankhiatna ah 2007 kum July kha akipan tuniciangdong Pakistan gamsung ah Islamist Bombers leh thautawi migilo te hangin mi 4800 val ki thatlum khin cimawk hi. ZomiDaily