Bunglung khua ah Zomi Music siamte Pasian nasepkhopna omding
March 6-10, 2012 sungin BUNGLUNG (Yayachu) khua ah Khangno Music sinna tawh nasepna kinei ding hi.
Sun hun sung teng music sinna hi ding a nitak sialin lasakna kinei ding hi. Hih Bunglung khua pen nidang a kipanin tu ni ciang dong mah Pasian thu a kilutpih zo nai het lo khua khat ahi hi.
Upngamloh zahin khua sung khangnote Music sin ding lawpcihtakin lawp uh ahih manin ih lungsim hong thosak mahmah hi.
Tapidaw Musiciante nasep theih dingte lakah a thupi tuampian pawl hi dingin um ih hih manin Zomi Tapidaw khangno Music siamte mahin Lai Natna tawh ma pan uh a, nulepa akua mahpeuh in panpih ciat dinghi hang.
Lasa siam Tg Sangpi, Tumging tumsiam Cinpi te kiangah hih thu ka gen ciangin hong thukim pah uh hi. Tua mah bangin Zomi 
lasasiam Lia Zamnu kiangah maitang kituah theilo in phone tawh ka gen ciangin "Sia aw kei zong hong kihel mah ning" hong ci pah lian leuleu hi. Zomi khangthak music siamte tungpanin hih bangin Pasian min tawh Siamna tungtawn a muhna ngahnate itsiik hetlo a, Pasian thu a sang nuam nailo khualegamte a khangno tampi te tungah nasep nading kiphalna hangin ih lungdamin ih tha hong dim sak mahmah uh hi.
Hih hun sungin Kawlpi panin Music tumsiam te leh lasa siam te hong kipia khia ding uh hi (Amin uh hong suaksak kik ning).
Zomi Christian Khangno Musiciante' kipumpiak a nasepna ahi hi. Kua mahin thaman lalo dingin thukim ngiat uh hi. Pasianin thupha hong piaksak kim ciat ta hen.
Tua hi a;
Music van kawmna nitak 5 ai dingin Ks. 500,000/- hi a Kawlgam sung a Zomi Music siam Cinpi (Lazy Club), Thawnkham, Sangpi, Zamnu te in nitak khat ai Ks. 100,000/- ta sum sik ding uh hi. A cianlai nitak khat pen KSCM panin ki hanciam ding hi. Vanpuak na ding, ciahlehkuan tawh kisai Ks. 100,000/- Rev Dr GoChinZam (OM-Director) te innkuanin hong sik uh hi. Tua banah Sun Music sin hun sung sun Niangtui dingin Tg Paulun te innkuanin Ks. 50,000/- hong sik ding uh hi.
Tu in Music vante a zat ding Meiset tui (diesel) lei na ding Ks. 50,000/-
Laikung laidal a ding (la dal khawng,...) Ks. 50,000/-
Khuasung makaite Lungdamkoh na ding van lei nuam Ks. 50,000/-
Theihkholhloh beina om ngel ding teng (Ks. 50,000/) tawh hi leh.....
Ih veina kibangin ih sepnopdan akibat leh hong zasak dingin na lamen nung.
"Topa nasepna ah Nuamsa semsem ing"
Tuan Khan Mung
Phone: (09) 4707 3054
Email: tuamung.khan@gmail.com
