Mangkang, Manglai, Mangpau

Ka neu lai, nitak lup ding ciangin ka nu in amau' neu lai-a piang Japan Gal lai thu, Tedim leh Lailui ah ama' tuahkhak sunsun teng hong gen thei zeel a, zaknop ka sa mahmah uhhi. Tua hong genna sungah Mangkang, Zapan, Zamani, Amelikan, Rasia cih minte a lawh lam ka phawk lai hi. Eimi sungah Piancit, Sen, Kala cih minte zong kizang hi.

A tomin: Mangkang i cih leh Zogam (Kawlgam bup) hong uk ngei British/English minamte gennopna hi. Tua lo, mikang dangte amau' gam min tek tawh kitam lawhzaw hi. Tua mah bangin Manglai Mangpau i cih ciangin English language cihnopna ahi hi. Lam khatin genkik lehang, a ci a sa a ngo a kang nitumna-lam mite a vekun mikangte hi a, tuate lakah khat ahi British/English mite ahihleh Mangkang i ci hi.

Hun khat ciangin leitung mundang gamdang pana aw-gingte eimi sungah zong a ciing pawlkhat hong om a, "Mangkang" ci-in i lawh ciangin sila lungsim tawh to a kai thapai, amau' khutsung pan a suakta khin i hihlam a kitel lo, eima' hihna dinmun (identity) a thupi-sim lo, suak hihang, ci uhhi. Ei zong a bu a mang tampi om khin lel hilo i hiam, cihna tawh "Mangkang" mun ah "mikang" ci-in zat kipan uhhi.

Tua hangin "Mangkang" leh "mikang" kikal ah a lungbuai mi a om thei ding mah ahi hi. Kua khial, kua maan, cihna hilo-in kammal pianzia (etymology) a kikum i hi bek hi. Kei' teldan leh kei' zatdan pulakna zong hi pah hi.

Genbehna:
"Mang dan" cih kammal khat i nei a, nitumna-lam mikangte' nunzia sepzia (western way/style) gennopna hi. Tua pen a gam a minam i khentel theihloh man ahi zongin, khentel kul lo-a a vek-un a pongpi-a gennop man ahi zongin, i zat kammal hi. Nitumna-lam mikangte' tatzia teng "Mang dan" i cihna a hang pen nitumna-lam mikang nam teng lakpan i muh i theih masak pen i gam hong uk British/English mite hi a, amaute "Mangkang" ci i hih manin amau' tatzia teng (a taktak, amau bek hi tuanlo-in nitumna-lam mikangte' tatzia teng) "Mang dan" a ci i hi hi. Tua hi a, "Mang dan" cih kammal in Mangkang leh mikang dang teng a vekin huam hi. Mang an, Mang mel, cihte zong tua dan mah hi. "Mangkang gam tawh kibang si!" i cih ciangin Britain/England bek a gen nuam zong hithei a, nitumna-lam gam pongpong a gen nuam zong hithei hi. Ahi zongin, Mangkang, Manglai, Mangpau cihte in (tuni ciangciang i zatdan ah) a vekin huam lo hi.

Mangno
Tawmvei: Hong Kong

(Pau Lian) Mangno
223A, Theology Building
Divinity School of Chung Chi College
The Chinese University of Hong Kong
Sha Tin, Hong Kong SAR